03 Iyun 2024

“Technovation Girls Uzbekistan” – O‘zbekistonda qizlar uchun yirik STEM-dastur – tanlovning navbatdagi mavsumini yakunlamoqda. Dastur “Tech4Impact” NNT tomonidan O‘zbekiston Oliy ta’lim, fan va innovatsiyalar vazirligi hamda «Yandex” texnologik kompaniyasi bilan hamkorlikda tashkil qilindi.

31-may kuni Toshkentda har yili “Tech4Impact” NNT tomonidan tashkil qilinadigan “Ayollar fan va texnologiyalar sohasida” Haftaligi doirasida “Girls in STEM Day”, “STEM sohasida qizlar kuni” tadbiri o‘tkazildi. Unda ishtirokchi qizlar va mentorlarning dasturning 4 oyi davomidagi faol ishiga yakun yasaldi.

Qizlarning ko‘pchiligi uchun “Technovation” dasturi – bu IT va STEM sohasini o‘rganish tomon tashlangan ilk qadam bo‘ldi. Xususan, ishtirokchi qizlar orasida o‘tkazilgan so‘rov ma’lumotlariga ko‘ra, “Technovation” tanlovida qatnashganidan keyin qizlar informatikani yaxshiroq tushunishni, AI (sun’iy intellekt)ning ishlashini o‘rganishni boshlashgan, ularning o‘zlariga bo‘lgan ishonchi oshgan, qizlar yetakchilik ko‘nikmalariga va o‘z hamjamiyatlaridagi muammolarni hal qilish ko‘nikmalariga ega bo‘lishgan.

Qizlardan iborat jamoalar maktablarda ta’lim sifatini oshirish, Toshkentdagi havoni monitoring qilish, gender tengsizligi va bullingni kamaytirish, jamiyatda inklyuziyani kuchaytirish, firibgarlik qo‘ng‘iroqlari va bank kartalaridan pul o‘g‘irlash holatlarining oldini olish kabi mavzulardagi loyihalarni ishlab chiqishdi. Loyihalarning ko‘pchiligi AI (sun’iy intellekt)dan foydalangan holda yaratilgan. Tadbirning qozog‘istonlik mehmonlari – “Technovation Girls Kazakhstan” mentorlari – “Technovation” dasturini o‘tkazish tajribasi va Qozog‘istonda qizlar uchun yaratilgan imkoniyatlar haqida so‘zlab berishdi.

Technovation Girls — qizlar uchun xalqaro texnologik tanlov bo‘lib, u har yili dunyoning 100+ mamlakatida o‘tkaziladi. Tanlovning maqsadi ishtirokchi qizlarga “moslashuvchan” ko‘nikmalarni berish, qizlarni IT-texnologiyalar, IT sohasidagi biznes va tadbirkorlikka qiziqtirishdan iborat.

12 haftalik dastur marketing, dasturlash, biznes-rejani tayyorlash, videomeyking va taqdimot o‘tkazish ko‘nikmalari bo‘yicha modullarni o‘z ichiga oldi. Treninglar va seminarlar Andijon, Namangan, Nukus, toshkent, Farg‘onada yuzma-yuz va onlayn shaklda o‘tkazildi. Qizlar texnologiyalar yordamida ijtimoiy ahamiyatga ega muammolarni hal qilishni o‘rganishdi va BMTning Barqaror Rivojlanish Maqsadlari bilan bog‘liq sohalarda innovatsion mobil ilovalarni yaratishdi.

31-may kuni o‘tkaziladigan bayram tadbirining dasturidan quyidagilar joy oldi:

• Toshkent, Andijon, Namangan, Nukus va Farg‘onadan Technovation Girls jamoalari (8-18 yoshdagi qizlar) ko‘rgazma stendlarida o‘z loyihalari ustida olib borgan ishlarining natijalarini namoyish etishdi, ijtimoiy mobil ilovalarini taqdim etishdi .
  

• “Technovation Girls” dasturining 10 ta jamoasi tadbir hamkorlarining mavzuli nominatsiyalarida taqdirlandi (nominatsiyalar orasida – sun’iy intellekt imkoniyatlaridan foydalanish bo‘yicha eng yaxshi loyihalar, xavfsiz shahar, gender tengligi, ekologiya, ta’lim va madaniyat, sog‘liqni saqlash, teng imkoniyatlarni taqdim etish mavzulari bor).

“Technovation Girls” dasturining xalqaro hakamlar hay’ati 4-iyun kuni O‘zbekistondan xalqaro tanlovda qatnashishda davom etadigan bir nechta jamoani aniqlaydi. “Technovation” dasturining xalqaro finali oktyabr oyida Kaliforniyada o‘tkaziladi. 2023-yilda Kremniy vodiysida (AQSh) o‘tkazilgan xalqaro finalda O‘zbekistonning “Tecnas” jamoasi maktablar uchun VR-laboratoriya ilovasi bilan ilk bor xalqaro tanlovning finaliga o‘tdi va butun dunyodan qatnashgan 2500 dan ortiq jamoa orasidan 12 ta eng yaxshi finalchi-jamoa safidan o‘rin olib, “Social Impact Award” nominatsiyasida (bu ijtimoiy muammolarni hal qilishga hissa qo‘shadigan “Technovation” dasturining eng yaxshi loyihasi uchun mukofot) g‘olib chiqdi.

“Technovation” dasturining barcha videoroliklari va loyihalari http://technovation.uz/allprojects2024 saytida chop etilgan.